Romadhon beuki cueut ka ahir. Nafakuran umur jeung kahirupan nu keur disorang....beuh geus lumayan panjang geuning lumampah teh. Saprak sawawa meureun geus aya kana tilu puluh tilu kalina kuring ngalaman puasa bari puasa. Baheula mah asa kumaha kitu nyorang puasa teh. Mangsa budak mah puasa teh teu jauh tina ngabuburit jeung ngumpul-ngumpul takjil. Teu leupas nyeungeutan pepetasan jeung bedil lodong. Dipapaes ku tadarus jeung kuliah subuh bari silih sered ari taraweh. (Ari ayeuna?....duh gusti asa jadi jalma pangsibukna gening kuring teh!.
Malikan deui ka mangsa budak, masih jelas dina ingetan kumaha kekerotna Pak Kuwu Suhro nahan amarah sabab nepi ka ek labuh kaseredkeun ku barudak (eh pamuda ketah). Tapi da ek ngambek kumaha da budakna sorangan kaasup anu rada mijah dina heureuy ari taraweh teh. Ngan sok aneh ku pengeresa Aa Ajengan (sok sanajan ayeuna anjeuna tos sepuh kuring masih keneh nyebut Aa) sakainget kuring teu pernah nyarek barudak kitu talajak! Aamiin patarik-tarik...shalawat diantara rokaat taraweh dihareureuykeun....alhamdulillah ayeuna mah geus teu aya silih sered ngan ari hohoak aamiin mah masih aya keneh (Ciri khas Asep budak Pak Kuwu Suhro tea).....sing tarik atuh aminna Ef! kita cenah anapok teh!
Ari jamaah taraweh, panyakitna sarua meureun jeung di wewengkon-wewengkon sejen. Pas malem kahiji pinuh....beuki lila beuki ngurangan! Tah mun asuk kana malem lilikuran karek rada pinuh deui.Sababna mah jelas.....aya tumpeng mun malem ganjil (malem 21, 23, 25, 27,29) sigana mah dina raraga mapag lailatul qodar. Istilah kanu sok taraweh ngan ukur malem ganjil teh nyaeta JAMALEM.....Ngahaja malem! Pangalaman naragog di Pos Ronda bari babarengan ngahuapkeun tumpeng sabalad-balad mangrupakeun pangalaman anu hese dipopohokeun salianti curuk anu bohak alatan pepetasan ngabeledug dina leungeun!
Tidak ada komentar:
Posting Komentar